commenter cet article …
|
السلام عليكم ورحمة الله تعالى وبركاته
حسوة خفيفة وتليق فايامات البرد او حتى فسيدنا رمضان نوعو بيها
بسيطة جدا وان شاء الله تعجبكن طريقتي
:المقادير
100 جرام هبرة دجاج مقطعة صغيرة او لحم احمر
شوية حمص مفزك
شوية عدس
2حبات طماطم محكوكة
بصلة صغيرة محكوكة
معلقة كبيرة كرفس
1تنسيمة ديال ماجي دجاج
معلقة كبيرة قزبور ومعدنوس
ملح.خرقوم بلدي.إبزار.سكنجبير
شوية زيت زيتون
شوية رز وشوية شعرية
زلافة صغيرة من الدشيشة
الماء باش نرويو تقريبن 3 ليتر
:الطريقة
كنعمل بصلة محكوكة فالكوكوت ونزيد عليها هبرة الدجاج او الللحم ونزيد البهارات ونشحرهم شويا ونضيف الحمص المرطب
والعدس ونروي بقيااسي ديال الماء
ثم كنسدو عليها واحد نصف ساعة ونشوفو واش الحمص طاب هو والعدس عادا باش كنظيف مطيشة محكوكة
وكرفس وقزبور ومعدنوس ونخليها واحد 10 دقائق اخرى تكمل طياب ثم بعدها كنزيد لها الشعرية
والروز والدشيشة عيني ميزاني كنحرك مزيان ونخليها واحد 10 دقائق اخرى وهاهي واجدة
نتمنى تعجبكن واي استفسارات انا حاضرة
السلام عليكم ورحمة الله تعالى وبركاته
شربة خفيفة وسريعة التحضير وجداا لذيذة وتنفع فاوقات البرد
:المقادير
بطاطا واحدة محكوكة فالحكاكة الغليظة.مظيشة واحدة كبيرة محكوكة.بصلة صغيرة محكوكة.نصف كاس روز.نصف كاس دشيشة.ملح.ابزار. ساشي ديال تنسيمة دجاج.مكعبات من لحم الصدر ديال الدجاج.معلقة كبيرة زيت زيتون.شوية معدنوس.شوية كرافس
:الطريقة
كنعملو اللحم يتشحر فبصلة وزيت وليقامة كنزيدو بطاطا ومطيشة ونضيفو الماء القياس الكافي ونخليوها طيب واحد نصف ساعة ثم بعدها كنزيدو الروز والدشيشة والساشي ديال بنة الدجاج والربيع والكرافس
نخليوها واحد ربع ساعة بالكثير ثم كنطحنوها بواسطة طحان يدوي ونقدموها بصحة والراحة
كتجي رااائعة وبنينة بزاف
اي استفسارات انا حاضرة
الحمد لله الدي بنعمه تتم الصالحات
السلام عليكم ورحمة الله تعالى وبركاته
المقادير:
جزرة واحدة كبيرة منقية ومحكوكة
1مطيشة مقشرة ومحيدة الزريعة ومقطعة رقيق
1فلفلة حمراءمقطعة مكعبات صغيرة
نصف بصلة مشلظة رقيق
2معالق كبار شوفان
دامة بنة السمك واحدة
2 باكيت اندومي القريدس ( الكروفيت) او باي نكهة بغيتو
ملعقة كبيرة معدنوس مقطع رقيق
ملح/ابزار/ شوية زعفران عرق مدقوق/راس معلقة سكنجبير
زيت زيتون
الطريقة :
في كوكوت كنوضعو شوية زيت زيتون ونعملو الخضر باش تتقلى فيها مزيانمع اضافة الملح والابزار واسكنجبير وزعفران عرق مطحون
كنضيفو بنة السمك ونضيفو مقدار ليتر ماء
نخليو الطنجرة تغلي شوية ونحسو الخضر دخلها الطياب كنضيف 2 معالق كبار الشوفان ونضيف2 بكيات اندومي
والمعدنوس ونحركوها ونضيفو بهارات الاندومي اللى كتكون معه فيها خليط مكون من زيت وخليط اخر فيه مكونات اخرى بحال التنسيمة .. باستثناء الكاري..كنظيفوه فوق الصحون للى عزيز عليه الحاار
نسدو الغطاء ديال الطنجرة واحد ربع ساعة وهاهو الحساء جاهز
كنغرفوه فصحون فردية وكنزينو باللى بغينا ..دوائر الحامض واوراق معدنوس
الصور تبين المراحل كلها واي استفسار انا حاضرة
الحمد لله الدي رزقنا هدا من غير حول ولا قوة
في آمآن الله